ഭൂതത്താന്‍ കെട്ടിയ കെട്ടു

ഈ പേര് കേൾക്കുമ്പോൾ നിങ്ങളോർക്കും ഇത് ഭൂതത്താൻ പെണ്ണ് കെട്ടാൻ പോയ കഥയാണെന്ന്. അങ്ങനെയാണോ?? വായിച്ചു നോക്ക് അപ്പോൾ അറിയാം.
ആരെങ്കിലും ഭൂതത്താന്‍കെട്ട് എന്ന് കേട്ടിട്ടുണ്ടോ? കേള്‍ക്കാന്‍ സാധ്യത കുറവാണു, കാരണം മുല്ലപെരിയാര്‍ പോലെ ഇന്നോ അല്ലെങ്കില്‍ നാളയോ എന്ന മട്ടില്‍ കിടക്കുകയല്ലാത്തതിനാൽ ചാനലുകളുടെ ക്യാമറ കണ്ണുകള്‍ ഒന്നും ഇങ്ങോട്ട് പതിഞ്ഞിട്ടില്ല
ഈ പേരുകൾക്ക് പിന്നിൽ വല്യ ചരിത്രങ്ങൾ ഒക്കെ ഉണ്ടാവുമല്ലോ. അങ്ങനെ നമ്മുടെ ഭൂതത്താന്‍കെട്ടിനും എന്തേലും ചരിത്രങ്ങൾ ഉണ്ടോ എന്ന അന്വേഷണമാണ് എന്നെ ഈ പോസ്റ്റ്‌ എഴുതാൻ പ്രേരിപ്പിച്ചത്.
ഈ  ഭൂതത്താന്‍കെട്ടിനു ഈ പേര് വരാന്‍ ഒരു കാരണമുണ്ട്. ആ കഥയാണ് ഞാന്‍ ഇന്ന് ഞാൻ ഇവിടെ പറയുന്നത്.  ഈ കഥയും കഥാപാത്രങ്ങളും തീര്‍ത്തും സാങ്കല്പികമാണ് എന്ന് ഉണര്‍ത്തുന്നു.ഇനി വേറൊരു കാര്യം, കഥ കഴിയുമ്പോള്‍ ആരും ചോദ്യം ചോദിക്കരുത് കാരണം കഥയില്‍ ചോദ്യം ഇല്ല എന്ന സത്യവും ഉണര്‍ത്തുന്നു.

പണ്ട്  പണ്ട് പണ്ട് പണ്ട്.....  കുറെ പണ്ട്.... അല്പം കൂടി പണ്ട്.....
ഇപ്പോഴത്തെ ഭൂതത്താന്‍കെട്ടിലൂടെ പെരിയാര്‍ നദി കള കള ആരവം മുഴക്കി ചുമ്മാ ആര്‍ക്കും ഉപയോഗവും ഉപദ്രവവും ഇല്ലാതെ ഒഴികി കൊണ്ടിരിക്കുന്ന കാലം. പുഴയുടെ ഒരു വശത്ത് നല്ല ജിമ്മന്മാരായ ഭുതങ്ങള്‍. പട്ടണത്തിലെ ഭുതം പോലെ ഭൂതത്താന്‍കെട്ടിലെ ഭുതങ്ങള്‍.........................
മറുവശത്ത്‌ ദുര്‍ബലരായ പച്ച മനുഷ്യര്‍. ഭൂതത്താന്മാര്‍ക്ക് കൃഷി ചെയ്യാന്‍ ഒരു മോഹം, അതിനായി വെള്ളം ആവശ്യമായി വന്നു.
തന്റെ പ്രജകളുടെ എന്തു ആഗ്രഹവും സാധിച്ചു കൊടുക്കുന്ന ദേവിയോട് സഹായം ചോദിച്ചു. ദേവി അവര്‍ക്ക് ഒരു വഴിയും പറഞ്ഞു കൊടുത്തു. പുഴയ്ക്കു കുറുകെ പാറ കല്ലുകൊണ്ട്  വെള്ളം കെട്ടി നിറുത്തി, പുഴയില്‍ നിന്നും വെള്ളം എടുത്തോളാൻ പറഞ്ഞു. ദേവി ഭൂതത്താന്മാര്‍ക്ക്  പുഴയ്ക്കു കുറുകെ പാറ കല്ലുകൊണ്ട് കെട്ടാനുള്ള അനുവാദം കൊടുത്തു എന്നറിഞ്ഞ പുഴയുടെ മറു വശത്ത താമസിക്കുന്ന മനുഷ്യര്‍ പരാതിയുമായി എത്തി . അവര്‍ പറഞ്ഞു, "ഭൂതത്തന്മാർ പുഴയ്ക്കു കുറുകെ കല്ലുകൊണ്ട് കെട്ടിയാല്‍, വെള്ള പൊക്കത്താല്‍ അവർ മുങ്ങി പോകും എന്നാണ് മനുഷ്യരുടെ പക്ഷം. ട്ടു

തന്റെ ഇരു കരയിലുമുള്ള പ്രജകളെ നിരാശരാക്കാന്‍ ദേവി ഒരിക്കലും ശ്രമിക്കില്ല. പ്രജകള്‍ക്കു 24 മണിക്കൂര്‍ കസ്റ്റമര്‍ കെയര്‍ പോലെ എന്തിനും ഏതിനും ഇപ്പോഴും എന്തും സാധിച്ചു കൊടുക്കുന്ന ദേവിക്ക് പണി പാലും വെള്ളത്തില്‍ ആണ് കിട്ടിയിരിക്കുന്നത്. ഭൂതത്താന്മാരോട് പുഴയ്ക്കു കുറുകെ പാറ കല്ലുകൊണ്ട് കെട്ടാനുള്ള അനുവാദം കൊടുക്കുകയും ചെയ്തു,  ഈ പാവങ്ങളെ വെള്ളം കുടപ്പിച്ചു കൊല്ലാനും പാടില്ല.
അതിനായി എന്ത് വഴിയുണ്ടെന്ന് ആലോചിച്ച്‌ ഇരിക്കുമ്പോളാണ് ദേവി TV ഇല്‍ mentos ന്റെ പരസ്യം കണ്ടത്‌. ഉടന്‍ അടുത്ത കടയില്‍ നിന്നും ബുദ്ധിക്ക് ഉണര്‍ച്ച നല്‍കാന്‍ mentos വാങ്ങി, നുണഞ്ഞു കൊണ്ടിരുന്നപ്പോള്‍ പെട്ടന്ന്‍ ദേവി ചാടി എണീറ്റു '' ബുദ്ധിക്ക് ഉണര്‍ച്ച കിട്ടി''.
അങ്ങനെ ദേവിയുടെ മനസ്സില്‍ ബള്‍ബ്‌ കത്തിയിരിക്കുന്നു.

ഭൂതത്താന്മാരോട് പിറ്റേ ദിവസം രാവിലെ സൂര്യന്‍ ഉദിക്കുന്നതിനു മുമ്പ് കെട്ടി തീർക്കണം എന്ന ഒരു സമയ പരിധി വച്ചു . അങ്ങനെ ഭൂതത്താന്മാര്‍ പണി ആരംഭിച്ചു. മതിയായ അമ്ണ്ടന്‍ സൈസ്  ഉള്ള ഭൂതത്താന്മാര്ക്ക് വളരെ പെട്ടന്നു തന്നെ പണിയുടെ മുക്കാല്‍ ഭാഗവും പൂര്‍ത്തിയാക്കാന്‍ കഴിഞ്ഞു. ഇങ്ങനെ പോയാല്‍ ഭൂതത്താന്മാര്‍ കെട്ടി കെട്ടുകയും പാവങ്ങള്‍ ചാവുകയും ചെയ്യും എന്ന് മനസ്സില്ലക്കിയ ദേവി ഒരു പൂവന്‍ കോഴിയുടെ രൂപം പ്രാപിച്ചു. അങ്ങനെ പൂവന്‍ കോഴിയുടെ രൂപത്തില്‍ സൂര്യന്റെ അടുത്ത പോയി കൂവി.
നേരം വെളുത്തു എന്ന് തെറ്റിദ്ധരിച്ച്‌ സൂര്യന്‍ ഉദിക്കുകയും ചെയ്തു. നേരം വെളുത്തിട്ടും പണി പൂര്‍ത്തിയാക്കാന്‍ സാധിക്കാത്തതിനാല്‍ ഭൂതത്താന്മാര്‍ സ്ഥലം കാലിയാക്കുകയും ചെയ്തു. ഭൂതത്താന്മാര്‍ പണിത് പൂര്‍ത്തിയാക്കാത്ത പറകല്ലുകള്‍ കൊണ്ടുള്ള കെട്ട് ഇപ്പോഴും അവിടെ ഉണ്ട്.
പക്ഷെ അതിനു മുകളിൽ മനുഷ്യർ വേറൊരു ഡാം കൂടി കെട്ടി. പക്ഷെ അത് അന്ത കാലത്തല്ല. ഇന്ത കാലത്ത് തന്നെ. ആ ഡാമിന്റെ ചിത്രം താഴെ കൊടുക്കുന്നു.